Биыл 1941-1945ж.ж. екінші дүниежүзілік соғыстағы Жеңіске 80 жыл. 2025 жылғы 11 наурызда «Ер есімі – ел есінде» жалпыреспубликалық музейлік акциясы аясында Жезді музейінде «Майдангер жолы» көрме-кездесуі өтті. 

Кері есептеу күнтізбесіндегі Жеңіске 60 күн қалуына орай ұйымдастырылған кездесуге Жезді кентінің ардагерлері, майдангер ұрпақтары, мектеп оқушылары қатысты.

Іс-шараның мақсаты қор деректері негізінде Жезқазған-Ұлытау аймағынан соғысқа аттанған жерлес жауынгерлердің ерлігін насихаттау.

Кездесу барысында майдангерлердің өміржолынан экранда деректер көрсетілді. Майдангер ұрпақтары әкелері жайлы естеліктер айтып, ел қорғау жолындағы бабалардың ерлігін ең кішкентай ұрпақтары – немере-шөберелері жатқа айтты. Отан үшін от кешкен жауынгерлердің марапат қағаздарының көшірмесі отбасыларына табысталды. «Музейге сый» акциясы шеңберінде майдангер ұрпақтары құнды жәдігерлерді музей қорына тапсырды.

Іс-шара соңында қонақтар майдангерлер көрмесімен танысты.